നടനും സംവിധായകനുമായ ബൈജു മരിച്ചു.. സിനിമാചര്ച്ച കഴിഞ്ഞു മടങ്ങും വഴി കഴിച്ച ഭക്ഷണം വില്ലനായി…
ആരോഗ്യത്തോടെ വന്ന് നര്മ്മം നിറഞ്ഞ കഥപറഞ്ഞു മടങ്ങിയ ബൈജുവിന്റെ മരണം ഉള്ക്കൊളളാന് കഴിയാതെ അണിയറപ്രവര്ത്തകര്.. ശാരീരിക അസ്വസ്ഥതയും പനിയും മൂലം ചികിത്സ തേടിയ സിനിമാ സംവിധായകനും പ്രൊഡക്ഷന് കണ്ട്രോളറുമായ ബൈജു പറവൂര് മരിച്ചു 42 വയസ്സായിരുന്നു പ്രായം. പറവൂര് നന്തികുളങ്ങര കൊയ്പാമഠത്തില് ശശിയുടെയും സുമയുടെയും മകനാണ്.
ഭക്ഷ്യവിഷബാധയെ തുടര്ന്നാണ് മരണമെന്ന് സംശയിക്കുന്നതായി ബന്ധുക്കള് പറഞ്ഞു. ഒരു സിനിമയുടെ ചര്ച്ചയുമായി ബന്ധപ്പെട്ട് കോഴിക്കോട്ട് ആയിരുന്ന ബൈജു ശനിയാഴ്ച കാറില് വീട്ടിലേക്ക് മടങ്ങുംവഴി ഹോട്ടലില് നിന്ന് ഭക്ഷണം കഴിച്ചിരുന്നു. ഇതിനുശേഷം അസ്വസ്ഥതകള് ഉണ്ടായതിനെ തുടര്ന്ന് ഭാര്യ ചിത്രയുടെ കുന്നംകുളത്തുള്ള വീട്ടിലേക്ക് പോവുകയും അവിടെ ചികിത്സ തേടുകയും ചെയ്തു. അസുഖം കുറയാത്തതിനെ തുടര്ന്ന് പറവൂരിലെ വീട്ടിലെത്തുകയും ഞായറാഴ്ച കുഴുപ്പിള്ളിയിലെ ആശുപത്രിയില് ചികിത്സ തേടുകയും ചെയ്തു. നില വഷളായതിനെ തുടര്ന്ന് കൊച്ചിയിലെ സ്വകാര്യ ആശുപത്രിയിലേക്ക് മാറ്റിയെങ്കിലും തിങ്കളാഴ്ച പുലര്ച്ചെ മരിച്ചു.
20 വര്ഷമായി സിനിമാ രംഗത്ത് സജീവമായ ബൈജു പ്രൊഡക്ഷന് എക്സിക്യുട്ടീവായും പ്രവര്ത്തിച്ചിട്ടുണ്ട്. സ്വന്തമായി കഥയും തിരക്കഥയും എഴുതി സംവിധാനം ചെയ്ത ‘സീക്രട്ട്’ എന്ന സിനിമയുടെ റിലീസിങ്ങിന് തയ്യാറെടുത്തുവരുകയായിരുന്നു. ധന്യം, മൈഥിലി വീണ്ടും വരുന്നു, കൈതോലചാത്തന് അടക്കം 45 സിനിമകളില് പ്രൊഡക്ഷന് കണ്ട്രോളര് ആയി പ്രവര്ത്തിച്ചിട്ടുണ്ട്. രണ്ട് മക്കളാണ് ആരാധ്യ, ആരവ്. ആദരാഞ്ജലികളോടെ FC